صفحة من مذكراتي

عندي جمعة موش قد بعضي ...تاعبه.... مريضة ...مدبرمة مانخرجش من بيتي
ماعنديش قدرة نخرج و نشوف ناس فديت مالوجوه كلها تشبه لبعضها وحدّ ما يشبه لحدّ.
بيتي ضلمة ...قبر ..نفس مفماش ...مخنوقة ...عندي مراية كبيرة ساعات نشوفني ..نتوحشني ...نغزرلي ...نونسني....
عندي برشا ماشفتنيش ... طفلة أخري في مرايتي تشبهلي ..أما موش أنا ....كل ماتشوفني تغزرلي في عيني و تبكي ...هي موش أنا .... سخفتني ...مخيبها
معاش نحب نراها ..غطيت المرايا ... معادش ريتها في بيتي ...أما مازلت نسمعها تبكي .... تبكي بعيني ... وتشهق بصوتي .....و بإيدي تمسحلي في دموعي
شبيني... سيبني أخرج مني .... تعبتني ... تبكيني وتمشي و تخليني أقف قدامي و رضيني ....... شدني من إيدي و قلي سامحيني
متمشيش كيفهم و تخليني ....تعبتيني
علاش في المراية كل مانشوفك تبكيني .... علاش هكة بالدموع عيني ،
علاش في الليل تمشي و تخليني ....نلوج عليك في الضلام ..تطفيني
تعرفني نخاف مالضلام .. علاش وحدي تخليني..... حتي إنتي كرهتيني
الليل طويل موحش ... ناس الكل راقدين و ناس مع الموتي ساهرين
قلي وين تمشي في الليل نلوج في مرايتي كان الضلام ......قلي كل ليلة وين تطير
نحب معاك نطير ....
عايشة مع موتي حييّن .... يتنفسوا أما موش عايشن ... قلي إنت وين ...
توحشت وجهك في البيت ... توحشت هبلتك و قلبك لخفيف ... أي خفيف
معادش لاقيتك .... قلبي ضعيف .... معبي ... ناقف.... نطيح
وينك أرجع خوذ بإيدي ماتخلنيش نطيح
أرجع أضحك بقلبي خلي يرجع خفيف ... أرجع قلي إنت'' أسماء"" أغزر في عيني و ماتبكيش
أرجع كمل إكتب بإيدي عليا و عليك .... أرجع نقراو كتب ....أرجع نعملو لعمايل الي ما تخطر علي بال حدّ .... أرجع و ردّ بالك تقلي "خلي قلبك يحب"
أرجعلي.....
‫#‏أسماء‬