عيد الحب
الدنيا يلزمها برشة حب باش تغلبها ، يلزمها القلب يدق ورعشة ولمعة فالعين وخيال كيف تسرح تتبسم وتحن وتلين . يلزمها كلمة 'نحبك 'و'توحشتك' 'ووينك' و'تعشيت' و'تجيني ولا نجيك' . يلزمها التعنيقة والبوسة على غفلة وشدة اليدين ويلزمها كلمة 'نغير' . ونغير وغيرتي موش كيف غيرتكم نغير على محبة موش كيف محبتكم ونحير كيف نهار يتعدى من غير محبة اي نحير . نحير فالغزرة الباردة والعينين الشاردة ، والقلب الفارغ والراجل اللي بالعو وباعث الدنيا والدين . نحير فى طفلة كيف الكل تعمله م وعلى صوابع ايديها تلعبهم والمشتاق كالخوصة في صبعها الصغير . ونموت فبنات الليساي والعشقة اللولة واول بوسة واول تركينة واول مرة تحط الحمير ، و حكايات اولاد الحومة والغزرة ويحبني ونحبو وكلام العينين . نحير كيف نتذكر ناس بكري وام الزين ، تفويرة الحمام والسواك والكحل فالعين، بوسة الخالة فوق الشفة والاحمر السحري وريحة الياسمين. نحير فالسفساري وما يوري والرمان والزنود والقد المقدود . نحير في محبتهم ونحير فالساقين وطراوتهم وبو الشاشية كيتركز في قلبو الخلخال ، كلو من بوسة الخال. ن...