أنثى الجبل

نَحْكِي على، العَرْبى وِلدْ تونس ، بدنْ، مَخَيخْ ورجُولية وِلدْ حومة شعبية يقُولْ بلّمْة و عندُو اللِى يَسمُوهَا الوَطَنية، معليناش، الكلمة هاكى برشة يعرفوا يِكْتبوها و مايفهموهاش يُنْطقُوها و مايحِسوُهاش،

 العربى كيف الشعب الكلْ قاري و متعلم حتي من لغة الكُفْار يتكلمْ قاري بعد الباك تلاثة سنين ولد فاك مِنسية فالقصرينْ حَصِّلْ الدِيبلومْ و قال على الضَالِينْ آمين اليوم نلقي خدمة، بلاد الغلبة لاخدمة لاهربة، شيعمل هذاك ولد الشعب مغرفة شنوة هزة قال يزي ملْ مِزيرية نِربَحْ الوقت و   نقصِّر الثنية. الشوماج كان ميقتلكش بالشرّ في تونس يوصلك إل اقرب ثكنة عسكرية، العربي لِبس الكمبة هاجت عليه الوطنية و المحبه ، فرحة الميمة و عينيها دمْعة ولد الربطْ شدّ حاكمْ ناس تباركْ و ناس التمتمْ فى التراكنْ. خالتي تونس تزغردْ في الدار و تقول" اليوم نقهر الأعداء و ننسي فقري والي تعدي". 

عامين تعدُو كالحلمة وعيد السنة العربي يُخطبْ يَقْري الفاتحة و ان شاء الله تِكْتب .

كلْ يُوم العربي يَكلمْ اُمو عليهَا يِطْمانْ'' مازالْ علْ عِيدْ مَحسوُبْ جِمعتينْ ونِتلمُو وفرحتي بتزغريدتك يا غالية تتكمل''

 هذا كلامو كل يوم، بخلاف اليوم، نهار سخون ثقيل الشمس تحرق العصْفور، جات لعشية الناس الكل تستني في المغرب يأذن إلا تونس تغزر للتليفون  تِتْنهدْ و تِتْغبنْ زعما نَسانِي و لا بِغيرِي لاَهِي لا لا اكيد سَاهي مَا يُشقْ فَطْرُو الاّ ما يَكلَمني تعدات سوايع فالمنقالة تونس حسبتهم  بدرج  و تونس تستني فالفرج نوقز التليفون :

ـآلو

ـٱلو وينك ياوِليدي من قبيلة متحيرة فيك نستني!! 

ـسامحني، سامحني يالميمة وِليدك غَدْروه و علي ترابْ الغالية دمو سَيْلوه وليدك يالميمة شَهيدْ كِيفْ البراهمي و بلعيد فقيدْ، سُقوها بدمْ العروقْ متبكيش هز راسك الفوقْ!

تونس مصدومة تُغْزرْ وعِينهَا ماتبكيشْ  ، تِشكي و فُمْها ما يَحْكيشْ العربي قَتلوهْ  نهارة العيدْ الكفن لبْسوُهْ، دموُ سَالْ بالعلمْ غَطوهْ ،في المِيسانْ العربي كرمُوهْ زادوهْ نِجمة و رقوه ْ.

تونس عزوها في ولدها كبيرْ وصغيرْ، شافت كِسوتْ ولدها لبسينهَا مئاتْ جَاوْ عَزُوهَا بِسكاتْ، تعّلمُو يحْكوُ بالعينْ، مُوتَي يَعزوُ فى حَيينْ ، وَقْفت تونس من بين القُعودْ زغردة وقالت ولدي شهيد تحت اللحُودْ اماّ دمو مزال يحمي الحدود  ولدى أنا تربَي عليَّا نَغّارْ جاء نهار و دموا عليا فارْ سِقيتوُا بدمعةْ رحمةْ موش غيارْ .... دفنوه، في قلوبهمْ خبوهْ وِعْدوهْ في طريقوا  يَتبْعوه ْ

نَموتُ نَموتُ و يحيا الوطنْ.

أسماء الغربي